ഷിരൂർ: കർണാടകയിലെ ഷിരൂരിൽ ഉരുൾപൊട്ടലിൽ കാണാതായ ട്രക്ക് ഡ്രൈവർ അർജുനുള്ള തിരച്ചിൽ ഗംഗാവലി നദിയിൽ ഇന്നും തുടരുന്നു. ഇന്നലെ സ്വാതന്ത്ര്യദിനമായതിനാൽ തിരച്ചിൽ നടന്നില്ല. മുങ്ങൽ വിദഗ്ധൻ ഈശ്വർ മാൽപെയുടെ നേതൃത്വത്തിലുള്ള സംഘവും നേവി ടീമും ട്രക്കിൻ്റെ സൂചനകൾ ലഭിച്ച പ്രദേശത്ത് തിങ്കളാഴ്ച ഡ്രഡ്ജിംഗ് സംവിധാനം എത്തിക്കുന്നതുവരെ മുങ്ങി തിരച്ചിൽ നടത്തുമെന്നാണ് റിപ്പോർട്ട്.
ഗോവയിൽ നിന്ന് ഡ്രഡ്ജർ കൊണ്ടുവരാനുള്ള ശ്രമം തുടരുകയാണ്. അർജുൻ്റെ ട്രക്കിൽ മരം ഘടിപ്പിക്കാൻ ഉപയോഗിച്ച കയറിൻ്റെ കഷണം കണ്ടെത്തിയത് ഈ ദൗത്യത്തിൽ നിർണായകമാണ്. കരയിൽ നിന്നും 50 അടി മാറി 30 അടി താഴ്ചയിൽ നിന്ന് കയർ കഷണം കണ്ടെത്തി. 10 അടി അകലത്തിൽ മൂന്ന് കയർ ഭാഗങ്ങൾ ഉണ്ടെന്നും ഈശ്വർ മൽപ് പറയുന്നു. ഈ സൂചനയായി കണക്കിലെടുത്ത്, ട്രക്ക് ഈ മേഖലയിൽ ഉണ്ടാവാൻ സാധ്യതയുണ്ട്. ഇന്നത്തെ തിരച്ചിൽ ഈ മേഖലയിൽ മാത്രം ശ്രദ്ധ കേന്ദ്രീകരിക്കും.
തിങ്കളാഴ്ച ഡ്രഡ്ജർ എത്തുന്നതിന് മുമ്പ് ട്രക്കിൻ്റെ ഭാഗങ്ങൾ കണ്ടെത്താനാകുമെന്നും ഈശ്വർ മാൽപെ ആത്മവിശ്വാസം പ്രകടിപ്പിച്ചു. സ്വാതന്ത്ര്യദിന പരേഡ് നടക്കുന്നതിനാലാണ് ഇന്നലെ തിരച്ചിൽ വേണ്ടെന്ന ജില്ലാ ഭരണകൂടത്തിൻ്റെ തീരുമാനം. ഒരു കാരണവശാലും തിരച്ചിൽ നിർത്തില്ലെന്ന് ജില്ലാ ഭരണകൂടവും ഉറപ്പ് നൽകുന്നുണ്ട്.
