തിരുവനന്തപുരം: കലോത്സവ വേദികളിൽ സുരക്ഷ ഉറപ്പാക്കാൻ എല്ലാ ആവശ്യമായ നടപടികളും സ്വീകരിക്കുമെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി. ശിവൻകുട്ടി അറിയിച്ചു. പൊലീസ് ഉൾപ്പെടെയുള്ള എൻഫോഴ്സ്മെന്റ് ഏജൻസികളുടെ യോഗം മന്ത്രി വിളിച്ച് ചേർത്തു. കലോത്സവത്തിന്റെ വിജയകരമായ നടത്തിപ്പിന് ഉദ്യോഗസ്ഥരും വകുപ്പുകളും ഏകോപിച്ച് പ്രവർത്തിക്കേണ്ടതിന്റെ ആവശ്യകതയെ മന്ത്രി ചൂണ്ടിക്കാട്ടി.
സെൻട്രൽ സ്റ്റേഡിയത്തിന്റെ പ്രത്യേകതകൾ പരിഗണിച്ച് കൃത്യമായും സുരക്ഷിതമായും വാഹന നിയന്ത്രണം നടപ്പിലാക്കും. 25 വേദികളിലും 25 അക്കോമഡേഷൻ സെന്ററുകളിലും ആയിരക്കണക്കിന് കുട്ടികൾ കലോത്സവത്തിൽ പങ്കെടുക്കാനും കാണാനുമെത്തും. അതിനാൽ, അവരുടെ സുരക്ഷയും ക്ഷേമവും ഏറ്റവും പ്രധാനമാണ്. ഓരോ വേദിയിലും ആവശ്യമായ സുരക്ഷാ സംവിധാനങ്ങൾ ഒരുക്കും. പെൺകുട്ടികൾക്കായുള്ള താമസസ്ഥലങ്ങളിൽ പിങ്ക് പൊലീസ് പട്രോളിംഗ് ഏർപ്പെടുത്തും. ഉദ്ഘാടന ദിവസം ഏകദേശം 250 ബസുകൾ നഗരത്തിലേക്ക് എത്താൻ സാധ്യതയുണ്ട്, കൂടാതെ നൂറുകണക്കിന് മറ്റ് വാഹനങ്ങളും സെൻട്രൽ സ്റ്റേഡിയത്തിൽ എത്തും. ഈ സാഹചര്യത്തിൽ, പാർക്കിംഗ് സൗകര്യം മുൻകൂട്ടി അറിയിക്കുമെന്ന് മന്ത്രി പറഞ്ഞു.
