പട്ന: ബിഹാറിൽ ഗംഗയ്ക്ക് കുറുകെ നിർമാണത്തിലിരിക്കുന്ന അഗുവാനി-സുൽത്താൻഗഞ്ച് പാലത്തിൻ്റെ ഒരു ഭാഗം തകർന്നു. ഇത് മൂന്നാം തവണയാണ് ഈ പാലം തകരുന്നത്. 2023 ജൂൺ 5 നും 2022 ഏപ്രിൽ 9 നും പാലത്തിൻ്റെ ഭാഗങ്ങൾ തകർന്നു. ശനിയാഴ്ച രാവിലെയാണ് പാലം തകർന്നത്. സംഭവത്തിൽ ആർക്കും പരിക്കേറ്റിട്ടില്ലെന്നാണ് അധികൃതരുടെ വിശദീകരണം. 11 വർഷമായി നിർമാണം നടന്നിരുന്ന പാലമാണ് തകർന്നത്. 1710 കോടി രൂപ ചെലവിലാണ് പാലത്തിൻ്റെ നിർമാണം പുരോഗമിക്കുന്നത്. അതേസമയം, ബീഹാറിൽ നാലാഴ്ചയ്ക്കിടെ 15 പാലങ്ങൾ തകർന്നു.
അരാരിയ ജില്ലയിലെ ഫോർബ്സ്ഗഞ്ച് ബ്ലോക്കിലെ അംഹാര ഗ്രാമത്തിൽ പാർമാൻ നദിക്ക് കുറുകെയുള്ള പാലവും കഴിഞ്ഞ ദിവസം കനത്ത വെള്ളപ്പൊക്കത്തിൽ തകർന്നിരുന്നു. സംസ്ഥാനത്ത് പലയിടത്തും പാലം തകർന്നതിൽ സുപ്രീംകോടതി ഇടപെട്ടിട്ടുണ്ട്. നിർമ്മാണത്തിലിരിക്കുന്ന എല്ലാ പാലങ്ങളും പരിശോധിക്കണമെന്ന് ആവശ്യപ്പെട്ട് അഭിഭാഷകനായ ബ്രജേഷ് സിംഗ് സമർപ്പിച്ച ഹർജി. തുടർന്ന് വിഷയത്തിൽ സുപ്രീം കോടതി ഇടപെട്ടു. ചീഫ് ജസ്റ്റിസ് ഡി വൈ ചന്ദ്രചൂഡ് അധ്യക്ഷനായ മൂന്നംഗ ബെഞ്ചിൻ്റേതാണ് ഉത്തരവ്.
