ടോവിനോ തോമസ്, തൃഷ കൃഷ്ണൻ, വിനയ് റായി എന്നിവരെ പ്രധാന കഥാപാത്രങ്ങളാക്കി നിർമ്മിച്ച ‘ഐഡന്റിറ്റി’ എന്ന ചിത്രം വിജയകരമായി പ്രദർശനം തുടരുന്നു. റിലീസ് ദിനം മുതൽ മികച്ച പ്രതികരണം ലഭിച്ച ഈ ചിത്രം രണ്ടാം വാരം കടക്കാൻ ഒരുങ്ങുകയാണ്. ഇതുവരെ 40.23 കോടിയോളം രൂപയാണ് ‘ഐഡന്റിറ്റി’ സമാഹരിച്ചിട്ടുള്ളത്. ആദ്യ നാല് ദിവസത്തിനുള്ളിൽ തന്നെ ലോകമെമ്പാടും 23.20 കോടി രൂപയുടെ കളക്ഷൻ ചിത്രം നേടുകയും ചെയ്തു. തമിഴ് പതിപ്പിലും ചിത്രം വലിയ വിജയം കൈവരിച്ചു.
വിവിധ തീയേറ്ററുകളിൽ മികച്ച ബുക്കിങ്ങോടെ പ്രദർശനം തുടരുന്ന ചിത്രത്തിന് 50 കോടി ക്ലബ്ബിൽ പ്രവേശിക്കാൻ അധികം വൈകില്ലെന്ന് ട്രേഡ് അനലിസ്റ്റുകൾ പ്രവചിക്കുന്നു. അടുത്ത ആഴ്ചകളിൽ “ഐഡന്റിറ്റി” തെലുങ്ക്, ഹിന്ദി ഭാഷകളിലും റിലീസ് ചെയ്യാനിരിക്കുകയാണ്.
കെട്ടുറപ്പുള്ള തിരക്കഥയും കഥ പറയലിൽ തിരക്കഥാകൃത്തുകൾ സ്വീകരിച്ച സമീപനവും ചിത്രത്തിന്റെ വിജയത്തിന് കാരണമാകുന്നു. ഈ ചിത്രത്തിന്റെ തിരക്കഥയെ എഴുതി സംവിധാനം ചെയ്തിരിക്കുന്നത് അഖിൽ പോളും അനസ് ഖാനും ആണ്. സാങ്കേതികതയിലെ മികവും ചിത്രത്തെ മികച്ചതാക്കുന്നു; അഖിൽ ജോർജിന്റെ ഛായാഗ്രാഹണം, ജേക്ക്സ് ബിജോയിയുടെ പശ്ചാത്തല സംഗീതം എന്നിവയും ശ്രദ്ധിക്കേണ്ട ഘടകങ്ങളാണ്.
അജു വർഗീസ്, ഷമ്മി തിലകൻ, അർജുൻ രാധാകൃഷ്ണൻ, വിശാഖ് നായർ, അർച്ചന കവി തുടങ്ങിയവരാണ് മറ്റ് പ്രധാന താരങ്ങൾ. ബിഗ് ബജറ്റിൽ നിർമ്മിച്ച ഈ ചിത്രം യു/എ സർട്ടിഫിക്കറ്റോടെ 2025 ജനുവരി 2-ന് റിലീസ് ചെയ്തു. ചിത്രത്തിന്റെ ആൾ ഇന്ത്യ വിതരണാവകാശം റെക്കോർഡ് തുകയ്ക്ക് ശ്രീ ഗോകുലം മൂവിസ് സ്വന്തമാക്കിയപ്പോൾ, ജിസിസി വിതരണാവകാശം ഫാഴ്സ് ഫിലിംസിന് ലഭിച്ചു.
