പോളിങ്ബൂത്തിലെത്തിയ അപ്രതീക്ഷിത അതിഥിയെ കണ്ട ഞെട്ടലിലാണ് ഉദ്യോഗസ്ഥരും വോട്ടർമാരും . അതിഥി മറ്റാരുമല്ല അണലി പാമ്പായിരുന്നു. തുമ്പൂര്‍മുഴി കാറ്റില്‍ ബ്രീഡിങ് ഫാമിന്റെ ഫുഡ് ആന്റ് ടെക്‌നോളജി കോളജ് ഹാളില്‍ ഒരുക്കിയിരുന്ന 79-ാമത് ബൂത്തിലാണ് ആറടിയോളം നീളമുള്ള അണലി പാമ്പിനെ കണ്ടത്.
രാവിലെ 11ഓടെയാണ് ബൂത്തിനുള്ളില്‍ പാമ്പിനെ കണ്ടത്. ഇതോടെ ആകെ പരിഭ്രാന്തിയിലായി ഉദ്യോഗസ്ഥരും വോട്ടർമാരും. എന്നാൽ ഉടനെ വനം വകുപ്പ് ഉദ്യോഗസ്ഥരെത്തി പാമ്പിനെ പിടികൂടുകയായിരുന്നു. പിന്നാലെ തടസ്സപ്പെട്ട വോട്ടിങ് പുനരാരംഭിക്കുകയായിരുന്നു.
അതേസമയം ആ സമയത്ത് വോട്ട് രേഖപ്പെടുത്താനെത്തിയവരുടെ എണ്ണം വളരെ കുറവായതിനാല്‍ കാര്യമായ തടസ്സം നേരിട്ടില്ല. വോട്ടിങിന്റെ ഭാഗമായി കഴിഞ്ഞ ദിവസം ഹാള്‍ വൃത്തിയാക്കിയാണ് സജ്ജീകരണങ്ങള്‍ ഒരുക്കിയത്. വനത്തോട് ചേര്‍ന്നുള്ള സ്ഥലമായതിനാല്‍ ഇവിടെ ഇഴജന്തുക്കളുടെ സാന്നിധ്യവും കൂടുതലാണ്.
