തിരുവനന്തപുരം: സംസ്ഥാന ശിശുക്ഷേമ സമിതിയിലെ എല്ലാ കുഞ്ഞുങ്ങൾക്കും അടിയന്തിര മെഡിക്കൽ പരിശോധന നടത്താനുള്ള തീരുമാനം എടുത്തു. പരിശോധനയ്ക്ക് വേണ്ടി പ്രത്യേക മെഡിക്കൽ ടീമിനെ നിയോഗിക്കണമെന്ന് ജില്ലാ ശിശുക്ഷേമ സമിതി ഡിഎംഒക്ക് ഇന്ന് കത്ത് നൽകും. രണ്ടരവയസ്സുകാരിയെ ജനനേന്ദ്രിയത്തിൽ മുറിവേൽപ്പിച്ച സംഭവത്തെയും, കൂടുതൽ കുഞ്ഞുങ്ങളെ മർദ്ദിക്കുന്നതിനെക്കുറിച്ചുള്ള മുൻ ഏഷ്യാനെറ്റ് ന്യൂസിലെ വെളിപ്പെടുത്തലുകളെയും അടിസ്ഥാനമാക്കി ഈ നടപടി സ്വീകരിക്കുകയാണ്. കുഞ്ഞുങ്ങളെ കൗൺസിലിംഗിനും വിധേയമാക്കും.
മനുഷ്യമനസ്സാക്ഷിയെ ഞെട്ടിക്കുന്ന മുന്‍ ആയയുടെ വെളിപ്പെടുത്തല്‍ ഇന്നലെയാണ് ഏഷ്യാനെറ്റ് ന്യൂസ് പുറത്തുവിട്ടത്. കുഞ്ഞുങ്ങളെ മാറോട് ചേര്‍ത്തുവെക്കേണ്ട ആയമാരില്‍ പകുതി പേരും ഇത്തരക്കാരാണെന്ന് മുന്‍ ജീവനക്കാരി വ്യക്തമാക്കിയിട്ടുണ്ട്. ഇതിന്റെ അടിസ്ഥാനത്തില്‍ സംസ്ഥാന ശിശുക്ഷേമ സമിതിയില്‍ എല്ലാ കുഞ്ഞുങ്ങളുടെയും അടിയന്തിര മെഡിക്കല്‍ പരിശോധന നടത്താന്‍ തീരുമാനിച്ചു. പ്രത്യേക സംഘത്തില്‍ മാനസികാരോഗ്യ വിദഗ്ധരും ഉള്‍പ്പെടും. ഇവരുടെ കൗണ്‍സിലിംഗില്‍ ഏതെങ്കിലും തരത്തിലുള്ള പീഡനവിവരം പുറത്ത് വന്നാല്‍ ശക്തമായ നടപടികള്‍ സ്വീകരിക്കാനാണ് തീരുമാനം. കൃത്യമായ ഇടവേളയില്‍ മോണിറ്ററിംഗ് സമിതിയുടെ സഹായത്തോടെ മിന്നല്‍ പരിശോധന നടത്താനും തീരുമാനിച്ചിട്ടുണ്ട്. പൊതുവും സ്വകാര്യ മേഖലകളിലുള്ള അഭയകേന്ദ്രങ്ങളില്‍ ജീവനക്കാരെ നിയമിക്കുന്നതില്‍ ജില്ലാ ശിശുക്ഷേമ സമിതികള്‍ക്ക് ഒരു പങ്ക് ഉണ്ടാകും.
