തിരുവനന്തപുരം: റൺവേ നവീകരണത്തിന്റെ ഭാഗമായി തിരുവനന്തപുരം അന്താരാഷ്ട്ര വിമാനത്താവളത്തിൽ വിമാന സർവീസുകൾ പുന:ക്രമീകരിക്കപ്പെടും. റൺവേയുടെ റീ കാർപെറ്റിങ് ഉൾപ്പെടെയുള്ള നവീകരണ പ്രവർത്തനങ്ങൾ 14-ാം തീയതി ആരംഭിക്കുന്നതിനാൽ, രാവിലെ ഒമ്പത് മുതൽ വൈകിട്ട് ആറ് വരെ റൺവേ അടച്ചിടും. ഈ സമയത്ത് നടക്കുന്ന വിമാന സർവീസുകളുടെ സമയക്രമം പുന:ക്രമീകരിച്ചിരിക്കുന്നു.
പുതിയ സമയക്രമം വിമാന കമ്പനികൾ യാത്രക്കാരെ അറിയിക്കും. രാവിലെ 8.50-നാണ് അവസാന സർവീസ്. മാർച്ച് 29 വരെ റൺവേ നവീകരണം നടക്കുന്നതിനാൽ, അതുവരെ നിലവിലെ സമയക്രമം തുടരും. 3374 മീറ്റർ നീളവും 60 മീറ്റർ വീതിയുമുള്ള റൺവേ 2017-ൽ അവസാനമായി നവീകരിച്ചിരുന്നു. നിലവിലുള്ള റൺവേയുടെ ഉപരിതലം പൂർണ്ണമായും മാറ്റി രാജ്യാന്തര മാനദണ്ഡങ്ങൾ പാലിക്കുന്ന തരത്തിൽ പുനർനിർമിക്കാനാണ് തീരുമാനം. കൂടാതെ, നിലവിലെ എയർഫീൽഡ് ഗ്രൗണ്ട് ലൈറ്റിങ് സിസ്റ്റം എൽഇഡി ലൈറ്റുകളിലേക്ക് മാറ്റും, പുതിയ സ്റ്റോപ്പ് ബാർ ലൈറ്റ് സ്ഥാപിക്കും.
ഒരു വർഷത്തോളം നീണ്ട മുന്നൊരുക്കങ്ങൾക്കു ശേഷം, റൺവേ നവീകരണം ആരംഭിക്കാൻ ഒരുങ്ങുകയാണ്. യാത്രക്കാർക്ക് അസൗകര്യം പരമാവധി കുറയ്ക്കുന്ന രീതിയിലാണ് സർവീസുകളുടെ പുനക്രമീകരണം നടത്തുന്നത്. ഈ കാലയളവിൽ പ്രതിദിനം 96 സർവീസുകൾ ഓപ്പറേറ്റ് ചെയ്യും. കൂടാതെ, ഏപ്രിൽ മുതൽ ആരംഭിക്കുന്ന വേനൽക്കാല ഷെഡ്യൂളിൽ കൂടുതൽ രാജ്യാന്തര സർവീസുകൾ ഉൾപ്പെടുത്താനുള്ള പദ്ധതിയുണ്ട്.
