തിരുവനന്തപുരം: സംസ്ഥാന കോണ്ഗ്രസിൽ നേതൃമാറ്റത്തിന്റെ ആവശ്യം ഇല്ലെന്ന് ശശി തരൂർ എംപി വ്യക്തമാക്കി. ലോക്സഭ തെരഞ്ഞെടുപ്പിൽ കെ സുധാകരന്റെ നേതൃത്വത്തിൽ മികച്ച വിജയം കൈവരിച്ചു. ഉപതെരഞ്ഞെടുപ്പിലും സീറ്റ് നിലനിർത്താൻ സാധിച്ചു. കെ സുധാകരന്റെ നേതൃത്വത്തിൽ പാർട്ടി മികച്ച പ്രകടനം കാഴ്ചവെച്ചതായി അദ്ദേഹം പറഞ്ഞു. സുധാകരനെ മാറ്റേണ്ടതില്ലെന്നും തരൂർ അഭിപ്രായപ്പെട്ടു.
കെപിസിസി പുനഃസംഘടനയെക്കുറിച്ച് ഔദ്യോഗികമായി ചർച്ചകൾ ഇതുവരെ നടന്നിട്ടില്ലെന്ന് തരൂർ അറിയിച്ചു. യുവാക്കളുടെയും സ്ത്രീകളുടെയും പ്രാതിനിധ്യം വർദ്ധിപ്പിക്കണമെന്ന് ഉദയ്പൂർ പ്രഖ്യാപനം ആവശ്യപ്പെടുന്നു. പിന്നോക്ക വിഭാഗങ്ങൾക്കും പ്രാതിനിധ്യം നൽകേണ്ടതുണ്ട്. കഴിഞ്ഞ നിയമസഭാ തെരഞ്ഞെടുപ്പിൽ യുവാക്കൾക്ക് സീറ്റ് നൽകിയെങ്കിലും അവർ വിജയിച്ചില്ല എന്നത് സംബന്ധിച്ച് പരാതികൾ ഉയർന്നിരുന്നു. എന്നാൽ, ഇവർക്ക് പ്രചാരണത്തിനായി മൂന്ന് ആഴ്ച മാത്രമാണ് ലഭിച്ചത്, ഇത് തിരിച്ചടിയായി മാറിയെന്ന് തരൂർ പറഞ്ഞു. യുവാക്കൾക്ക് അവസരം നൽകേണ്ടതുണ്ടെന്നും നല്ല മാറ്റങ്ങൾ ഉണ്ടാകുമെന്ന് അദ്ദേഹം കൂട്ടിച്ചേർത്തു.
വാർഡ് വിഭജനത്തിന്റെ അടിസ്ഥാനത്തിൽ എന്താണ് തീരുമാനമെന്ന് വ്യക്തമല്ലെന്നും ശശി തരൂർ അഭിപ്രായപ്പെട്ടു. തിരുവനന്തപുരത്ത് മത്സ്യത്തൊഴിലാളി കുടുംബങ്ങൾ അസന്തുഷ്ടരാണ്. രാഷ്ട്രീയ കാരണങ്ങൾ ഉണ്ടോ എന്ന സംശയം ഉണ്ട്. വാർഡ് വിഭജനത്തിന്റെ അടിസ്ഥാനത്തിൽ വിശദീകരണം ആവശ്യപ്പെടുകയും ചെയ്തു.
