കൊച്ചി: ആലുവയില്‍ ലൈംഗിക പീഡനത്തിന് ഇരയായി കൊല്ലപ്പെട്ട അഞ്ചു വയസുകാരിയുടെ അന്ത്യ കര്‍മങ്ങള്‍ നടത്താന്‍ പൂജാരിമാര്‍ വിസമ്മതിച്ചെന്ന പരാമര്‍ശം തെറ്റെന്ന് സമ്മതിച്ച് രേവത് ബാബു. തനിക്ക് തെറ്റുപറ്റിയെന്നും പൂജാരിമാരെ അടച്ചാക്ഷേപിച്ചതില്‍ ക്ഷമ ചോദിക്കുകയാണെന്നും രേവത് ഫേസ്ബുക്ക് ലൈവിലൂടെ പറഞ്ഞു. ഇയാള്‍ക്കെതിരെ കലാപം ഉണ്ടാക്കാന്‍ ശ്രമിച്ചെന്ന പരാതി റൂറല്‍ എസ്പിക്ക് ലഭിച്ചതിന് പിന്നാലെയാണ് നീക്കം.
മാധ്യമശ്രദ്ധ നേടാനുള്ള വ്യാജ ആരോപണമാണ് രേവത് നടത്തിയതെന്നും മതസ്പര്‍ധ വളര്‍ത്താന്‍ ശ്രമിച്ചെന്നും ചൂണ്ടിക്കാട്ടി ആലുവ സ്വദേശി അഡ്വ.ജിയാസ് ജമാലാണ് പരാതി നല്‍കിയത്. രേവതാണ് കുട്ടിയുടെ അന്ത്യകര്‍മ്മം ചെയ്തത്. പൂജാരിമാര്‍ എത്താന്‍ വിസമ്മതിച്ചതിനാലാണ് പൂജാകര്‍മ്മങ്ങള്‍ വലുതായി അറിയില്ലെങ്കിലും അതിനു തയ്യാറായതെന്ന് ഇയാള്‍ മാധ്യമങ്ങളോട് പ്രതികരിച്ചിരുന്നു. കുട്ടിയുടെ മൃതദേഹം കീഴ്മാട് പൊതുശ്മശാനത്തില്‍ സംസ്‌കരിച്ച ശേഷം അന്‍വര്‍ സാദത്ത് എംഎല്‍എയ്‌ക്കൊപ്പമാണ് ഇയാള്‍ മാധ്യമങ്ങളെ കണ്ടത്.
‘പൂജാരിമാരെ തിരഞ്ഞ് ആലുവ പോയി, മാള പോയി, കുറമശ്ശേരി ഭാഗത്തൊക്കെ അലഞ്ഞു. ഒരു പൂജാരിയും വരാന്‍ തയാറായില്ല. അവരൊന്നും മനുഷ്യന്മാരല്ല. അവര്‍ ചോദിച്ചത് ഹിന്ദിക്കാരുടെ കുട്ടിയല്ലേ എന്നാണ്. ഹിന്ദിക്കാരുടെ കുട്ടിയാണെങ്കിലും മനുഷ്യന്മാര്‍ തന്നെയല്ലേ? അപ്പോള്‍ ഞാന്‍ വിചാരിച്ചു, നമ്മുടെ മോള്‍ടെ കാര്യമല്ലേ, ഞാന്‍ തന്നെ കര്‍മം ചെയ്യാം എന്ന്. എനിക്ക് കര്‍മങ്ങള്‍ അത്ര നന്നായി അറിയുന്ന ആളല്ല. ഞാന്‍ ഇതിനു മുന്‍പ് ഒരു മരണത്തിനേ കര്‍മം ചെയ്തിട്ടുള്ളൂ. ഇതു കേട്ടപ്പോള്‍ എനിക്ക് ആകെ വല്ലായ്മ തോന്നി’ രേവത് പറഞ്ഞു. ഈ വാദം വലിയ രീതിയില്‍ സോഷ്യല്‍ മീഡിയയില്‍ ചര്‍ച്ചയായിരുന്നു.
