ശ്രീഹരിക്കോട്ട: യൂറോപ്യൻ ബഹിരാകാശ ഏജൻസിയുടെ പ്രോബ-3 ഉപഗ്രഹത്തിന്റെ വിക്ഷേപണം മാറ്റിവച്ചു. ഉപഗ്രഹത്തിൽ സാങ്കേതിക പ്രശ്നങ്ങൾ കണ്ടെത്തിയതിന്റെ അടിസ്ഥാനത്തിലാണ് ഈ തീരുമാനം. ഐഎസ്ആർഒ പിഎസ്എൽവി-സി59 ഉപയോഗിച്ച് വിക്ഷേപണം നടത്താൻ പദ്ധതിയിട്ടിരുന്നു. ഇന്ന് വൈകിട്ട് 4.08ന് വിക്ഷേപണം നടക്കാനായിരുന്നു. 43 മിനിറ്റ് 50 സെക്കൻഡ് ബാക്കിയുള്ളപ്പോൾ കൌണ്ട്ഡൗൺ നിർത്തി. നാളെ വൈകിട്ട് 4.12ന് വിക്ഷേപണം നടത്താൻ ശ്രമിക്കുമെന്ന് അറിയിച്ചിട്ടുണ്ട്.
ഐഎസ്ആർഒ ബഹിരാകാശ രംഗത്ത് പുതിയൊരു ചരിത്രം സൃഷ്ടിക്കാൻ തയ്യാറെടുക്കുകയാണ്. ഐഎസ്ആർഒയുടെ വാണിജ്യ വിഭാഗമായ ന്യൂസ്പേസ് ഇന്ത്യാ ലിമിറ്റഡ് (എൻഎസ്ഐഎൽ) യൂറോപ്യൻ സ്പേസ് ഏജൻസിയുമായി (ഇഎസ്എ) ചേർന്ന് പ്രോബ-3 ദൗത്യം നടത്തുന്നു. ഇഎസ്എ നിർമ്മിച്ച കൊറോണഗ്രാഫ്, ഒക്യുല്റ്റര് എന്നീ രണ്ട് ഉപഗ്രഹങ്ങളെ ഐഎസ്ആർഒ ഒരു പ്രത്യേക വിക്ഷേപണ വാഹനത്തിലൂടെ ബഹിരാകാശത്തിലേക്ക് അയക്കുകയാണ്. ഇസ്രോയുടെ മറ്റ് ദൗത്യങ്ങളുമായി താരതമ്യപ്പെടുത്തുമ്പോൾ, പ്രോബ-3 ദൗത്യത്തിന് ചില പ്രത്യേകതകൾ ഉണ്ട്.
സൂര്യന്റെ അന്തരീക്ഷത്തിലെ ഏറ്റവും ബാഹ്യവും ചൂടേറിയ കൊറോണയെ കുറിച്ച് പഠിക്കുകയാണ് പ്രോബ-3യിലെ ഈ രണ്ട് കൃത്രിമ ഉപഗ്രഹങ്ങളുടെ ലക്ഷ്യം. നിശ്ചിത ഉയരത്തിൽ ഒരു ഉപഗ്രഹത്തിന് മുന്നിൽ മറ്റൊരു ഉപഗ്രഹം എത്തുന്ന രീതിയിൽ പ്രത്യേകമായി രൂപകൽപ്പന ചെയ്തതാണ് ഇത്.
