ദില്ലി: സ്വകാര്യ ടെലികോം കമ്പനികളുടെ നിരക്കുകള് ഉയര്ന്നതിനെ തുടര്ന്ന്, ഉപഭോക്താക്കളുടെ എണ്ണം വര്ധിച്ചിട്ടുള്ള ബിഎസ്എന്എല് എന്ന പൊതു നെറ്റ്വര്ക്കിന്റെ പുതിയ കണക്കുകള് പുറത്തുവിട്ടു. 2024 ജൂലൈ മുതല് ഒക്ടോബര് വരെ 55 ലക്ഷം ഉപഭോക്താക്കള് മറ്റ് നെറ്റ്വര്ക്കുകളില് നിന്ന് സിം പോര്ട്ടിംഗ് വഴി ബിഎസ്എന്എല്ലിലേക്ക് മാറിയതായി ദേശീയ മാധ്യമമായ ന്യൂ ഇന്ത്യന് എക്സ്പ്രസ് റിപ്പോര്ട്ട് ചെയ്യുന്നു.
2024 ജൂലൈ മുതല് ഒക്ടോബര് മാസം വരെ സബ്സ്ക്രൈബര്മാരുടെ എണ്ണത്തില് ബിഎസ്എന്എല് വന് വളര്ച്ചയാണ് രേഖപ്പെടുത്തിയത്. ജൂലൈയില് ബിഎസ്എല്ലിലേക്ക് റിലയന്സ് ജിയോ, ഭാരതി എയര്ടെല്, വോഡാഫോണ് ഐഡിയ എന്നീ നെറ്റ്വര്ക്കുകളില് നിന്ന് 15 ലക്ഷം യൂസര്മാര് സിം പോര്ട്ട് ചെയ്ത് എത്തി. ഓഗസ്റ്റില് ഈ നമ്പര് 21 ലക്ഷം ആയി ഉയര്ന്നു. സെപ്റ്റംബറില് 11 ലക്ഷം പേരും ഒക്ടോബറില് 7 ലക്ഷം പേരും മറ്റ് ടെലികോം നെറ്റ്വര്ക്കുകളില് നിന്ന് പോര്ട്ട് ചെയ്ത് ബിഎസ്എന്എല്ലിലേക്കെത്തി. 2024 ജൂണില് ബിഎസ്എന്എല്ലിലേക്ക് 63,709 സിം പോര്ട്ടിംഗുകള് മാത്രമുണ്ടായിരുന്ന സ്ഥാനത്താണ് പിന്നീടുള്ള മാസങ്ങളിലെ കുതിപ്പ്.
